بڑھتی ہوئی تجارتی کشمکش سے امریکہ چین کی مارکیٹ میں اپنے شیئرز کھو رہا ہے: چینی وزارت خارجہ
چین کی وزارت خارجہ کے ترجمان گنگ شوانگ نے بیس ستمبر کو اپنے بیان میں کہا کہ بڑھتی ہوئی تجارتی کشمکش سے امریکہ چین کی مارکیٹ میں اپنے شیئرز کھو رہا ہے اور اس سے امریکہ کے عام شہریوں کے مفادات کو نقصان پہنچ رہا ہے ۔
اطلاع کے مطابق امریکہ -چین تجارتی قومی کمیٹی نے حال ہی میں چین کے لیے امریکہ کی برآمدات کے حوالے سے ایک رپورٹ پیش کی جس میں کہا گیا ہے کہ چین امریکہ تجارتی جنگ اور باہمی تعلقات میں کشیدگی کےاضافے سے چینی منڈی میں امریکی کمپنیوں کے داخلے پر منفی اثرات مرتب ہوئے ہیں ۔ اس کے تناظر میں گنگ شوانگ نے کہا کہ اس رپورٹ سے ظاہر ہوتا ہے کہ امریکہ کا صنعتی و تجارتی حلقہ اور مقامی حکومتیں چین امریکہ تجارتی کشمکش میں اضافے پر تشویش کا شکار ہیں ۔ چین کو امید ہے کہ امریکی حکومت عام شہریوں کی رائے اور خیالات کی طرف توجہ دیتے ہوئے چین کے ساتھ باہمی احترام ، مساوات اور مفادات کی بنیاد پر معاہدے کی تشکیل کے لیے کوشش کرے گی ۔