عالمی ادارہ صحت کے ڈائریکٹر جنرل کی جانب سے چین کے طبی عملے کو خراج تحسین

عالمی ادارہ صحت کے ڈائریکٹر جنرل ٹیڈروس ادھانوم گریبیسس نے نو تاریخ کو اپنی سوشل میڈیا کی ویب سائٹ پر نوول کرونا وائرس انفیکشن کے نمونیا کی وبا کا مقابلہ کرنے والے چینی طبی عملے کو خراج تحسین پیش کیا۔

ٹیڈروس نے کہا کہ میں چین ، خاص طور پر صوبے ہوبے میں کام کرنے والے طبی عملے کو خراج تحسین پیش کرتا ہوں۔ یہ لوگ شدید دباؤ کے باوجود نہ صرف نوول کرونا وائرس سے متاثرہ مریضوں کی دیکھ بھال کررہے ہیں بلکہ وائرس کے مطالعہ کے لئے ضروری اعدادوشمار بھی جمع کررہے ہیں۔ ان کا کہنا تھا کہ پوری دنیا علاج کے بہترین طریقہ کار کی تلاش کرنے اور وائرس کے پھیلاؤ کی روک تھام کے لئے مدد فراہم کرنے پر آپ کی شکر گزار ہے ۔ ٹیڈروس نے ساتھ ہی پرزور الفاظ میں کہا کہ طبی ماہرین اور سائنسدان اعدادوشمار سے فائدہ اٹھا کر نوول کرونا وائرس کا مقابلہ کرنے کے لئے بین الاقوامی تعاون کررہے ہیں۔

یاد رہے کہ عالمی ادارہ صحت نے چھ فروری کو اعلان کیا تھا کہ گیارہ اور بارہ فروری کو جنیوا میں نوول کرونا وائرس کے حوالے سے بین الاقوامی سیمینار کا انعقاد کیا جائے گا ۔ اس سیمینار کا مقصد دنیا بھر میں موجود سائنس و ٹیکنالوجی کی قوت سے فائدہ اٹھا کر نوول کرونا وائرس پر تحقیق میں مدد حاصل کرنا ہے۔ تاکہ اس مرض کےعلاج کے طریقہ کار اور موثر ویکسین کی تیاری کو جلد از جلد عمل میں لایا جا سکے۔