چین کی آسیان ممالک کے ساتھ بحیرہ جنوبی چین کے ضابطہِ اخلاق کے بارے میں مشاورت کو آگے بڑھانے کی خواہش

اٹھائیس جولائی کوچینی وزارت خارجہ کے ترجمان وانگ وین بین نے بیجنگ میں منعقدہ پریس کانفرنس میں کہا کہ چین آسیان ممالک کے ساتھ بحیرہ جنوبی چین کے ضابطہِ اخلاق کے بارے میں صلاح ومشورے کو آگے بڑھانے پر تیار ہے تاکہ جلد ہی ایسے اصول و ضوابط طے کیے جا سکیں جن پر ،چین اور آسیان مشترکہ طور پر کاربند رہیں ۔

وانگ وین بین نے کہا کہ حال ہی میں امریکی وزیر خارجہ مائیک پومپیو نے بحیرہ جنوبی چین کے مسلے پر چین کو بدنام کرنے کی کوشش کی ہے ،دراصل یہ چین نہیں امریکہ ہے جو بحیرہ جنوبی چین میں مسلح تنازعات کو ہوا دے کر علاقائی صورت حال کو پریشان کن بنا رہا ہے ۔ ذرائع ابلاغ کے مطابق ،رواں سال کے پہلے نصف میں امریکی فوجی طیاروں نے بحیرہ جنوبی چین پر دو ہزار سے زائد مرتبہ کارروائیاں کیں ۔ رواں ماہ کی پندرہ تاریخ سے اب تک امریکی فوجی طیارے مسلسل بارہ دنوں تک بحیرہ جنوبی چین پہنچے اورجاسوسی کرنے کی کوشش کی ۔ یہ ناصرف خطے کے امن و استحکام کے لیے نقصان دہ ہے بلکہ یہ بحیرہ جنوبی چین کے اردگرد موجود تمام ممالک کے مفادات کی بھی خلاف ورزی ہے ۔ امریکہ کی ان کارروائیوں کا کیا مقصد ہے ؟ امریکہ کو یہ واضح کرنا چاہیے ۔