پاکستان اور تاجکستان کے درمیان دوطرفہ تعلقات کومزید فروغ دینے پر اتفاق

پاکستان کی تاجکستان کو  سی پیک کے تجارتی روٹ سے استفادہ کرنے کی دعوت، دونوں ملکوں کے درمیان زمینی، فضائی اور ریل  رابطے ،تجارت اور خوشحالی کو فروغ دینے میں مدد گار ثابت ہونگے، صدر ممنون حسین

 اشک آباد (آئی این پی ) پاکستان اور تاجکستان کے  درمیان   دوطرفہ تعلقات کومزید فروغ دینے پر اتفاق  ہو گیا ،تاجک صدر نے کہا  پاکستان کی دسویں نمائش میں اپنا تجارتی وفد بھیجیں گے، تاجکستان پاکستان کے ساتھ براہ راست فضائی رابطے بحال کرنے کے اقدامات بھی کرے گا۔   اشک آباد میں صدر ممنون حسین اور ان کے تاجک ہم منصب امام علی رحمان کے درمیان ملاقات  ہوئی  جس میں  دونوں نے پاکستان اور تاجکستان کے  درمیان   دوطرفہ تعلقات کومزید فروغ دینے پر اتفاق کیا  ۔اس موقع پر اظہار خیا ل کرتے ہوئے صدر مملکت ممنون حسین نے کہاکہ دونوں ملکوں کے درمیان زمینی، فضائی اور ریل کے رابطے ،تجارت اور خوشحالی کو فروغ دینے میں مدد گار ثابت ہونگے۔انہوں نے کہاکہ علاقائی اور عالمی مسائل پر دونوں ملکوں کا موقف یکساں ہے اور تجارت کو فروغ دینے کے وسیع تر مواقع ہیں۔صدر نے کہاکہ پاکستان کاسا1000 منصوبوں کی بروقت تکمیل کو انتہائی اہمیت دیتا ہے۔تاجکستان کے صدر نے کہا کہ ان کا ملک پاکستان کی دسویں نمائش میں اپنا تجارتی وفد بھیجے گا انہوںنے یہ یقین بھی دلایا کہ تاجکستان پاکستان کے ساتھ براہ راست فضائی رابطے بحال کرنے کے اقدامات بھی کرے گا۔