پاکستان اور ایران کا اپنی سرزمین ایک دوسرے کے خلاف استعمال نہ ہونے دینے پراتفاق

تہران(آئی این پی ) آرمی چیف جنرل قمر جاوید باجوہ نے ایرانی وزیر دفاع بریگیڈیئر جنرل عامر حاتمی سے ملاقات کی جس میں دونوں ممالک کا اپنی سرزمین ایک دوسرے کے خلاف استعمال نہ ہونے دینے پر اتفاق کیا گیا۔ ایرانی وزیردفاع نے دورے پر آرمی چیف کا شکریہ ادا کیا جب کہ دہشت گردی کے خلاف جنگ میں پاکستان کی کامیابیوں کو سراہا۔ایرانی وزیردفاع نے پاکستان سے دفاعی تعاون بڑھانے پررضامندی ظاہر کرتے ہوئے کہا کہ ایران کی پالیسی پاکستان اور ہمسایہ ممالک سے تعلقات بڑھانا ہے اور پاکستان کے ساتھ تعلقات خارجہ پالیسی میں خصوصی اہمیت رکھتے ہیں۔  اس موقع پر آرمی چیف جنرل قمر جاوید باجوہ کا کہنا تھا کہ دونوں ممالک کو بارڈز محفوظ بنانے کیے لئے اقدامات کرنے کی ضرورت ہے۔ پاکستان اورایران نے فیلڈ کمانڈرزکے درمیان ہاٹ لائن قائم کرنے، سرحدی گشت اورانٹیلی جنس معلومات کے تبادلے پر بھی اتفاق کیا۔