سی پیک کے تحت گلگت اور بلتستان سمیت چاروں صوبوں میں نو خصوصی اقتصادی زونز قائم کئے جائینگے

اسلام آباد (آئی این پی ) چین پاکستان اقتصادی راہداری کے تحت گلگت اور  بلتستان  سمیت چاروں صوبوں میں نو خصوصی اقتصادی زونز قائم کئے جائینگے۔ تفصیلات کے مطابق چین پاکستان اقتصادی راہداری کے بارے میں کابینہ کی کمیٹی کا اجلاس وزیر اعظم شاہد خاقان عباسی کی صدارت میں اسلام آباد میں ہوا ۔اجلاس میں پانی اور بجلی کی فراہمی ،گوادر ائیر پورٹ کی تعمیر ،فری پورٹ،بندر گاہ کی توسیع اور خصوصی اقتصادی زونز کے قیام سمیت اقتصادی راہداری کے تمام منصوبوں پر تفصیلی تبادلہ خیال کیا گیا ۔وزیر اعظم کے معاون خصوصی اور ترجمان مصدق ملک نے اجلاس کی کارروائی کے بارے میں صحافیوں کو بریفنگ دیتے ہوئے کہاکہ کمیٹی نے خصوصا گوادر کی مستقبل کی ضروریات کے پیش نظر ایران سے بجلی کی در آمد سے متعلق تجویز پر تفصیلی غور کیا ۔انہوں نے کہاکہ پاکستان ،ایران پر عالمی پابندیوں کے خاتمے کی صورت میں اس کے ساتھ گیس پائپ لائن منصوبہ مکمل کر نے کو تیارہے ۔وزیر اعظم کے معاون خصوصی نے کہاکہ چین نے گوادر کے بین الاقوامی ہوائی اڈے کی تعمیر کیلئے بائیس ارب روپے سے زائد گرانٹ فراہم کی ہے اور اس منصوبے پر کام آئندہ سال کے وسط تک شروع کر دیا جائیگا ۔انہوں نے کہاکہ حکومت گوادر میں بارش کے پانی پر انحصار ختم کر نے کی حکمت عملی بھی تیار کررہی ہے اور اس نے پانی کی ضروریات پوری کر نے کیلئے اس طویل مدتی منصوبے کے حوالے سے تجاویز طلب کی ہیں ۔ترجمان نے کہاکہ حکومت نے صنعتی اقتصادی زونز قائم کر نے والی تجارتی کمپنیوں کیلئے کسٹم ڈیوٹی میں پانچ سالہ چھوٹ اور جون دوہزار بیس سے پہلے کام شروع کر نے والی صنعتوں کیلئے ٹیکس سے دس سالہ استثنی کااعلان کیا ہے ۔انہوں نے کہاکہ حکومت نے گیارہ ماہ کی مدت میں ساٹھ کروڑ کیوبک فٹ پیداواری گنجائش کا گیس کی فراہمی کا پلانٹ نصب کیا ہے اور اسی طرح دوسروے پلانٹ کا چندروز میں افتتاح کیا جائیگا ۔انہوں نے کہاکہ چین پاکستان اقتصادی راہداری سے متعلق مشترکہ تعاون کمیٹی کااجلاس منگل کو ہوگا جس میں تمام متعلقہ امور کے علاوہ اقتصادی راہداری کے تحت طویل منصوبوں پر غور کیا جائیگا ۔