پاکستان اور افغانستان کا مسائل مذاکرات کے ذریعے حل کرنے پر اتفاق

کابل(آئی این پی ) پاکستانی  وزیر اعظم شاہد خاقان عباسی نے افغان صدر اشرف غنی سے کابل میں ملاقات میں پاک افغان مسائل کو مذاکرات کے ذریعے حل کرنے پر اتفاق کیا ۔تفصیلات کے مطابق وزیراعظم شاہد خاقان عباسی افغانستان کے صدر اشرف غنی کی دعوت پر ایک روزہ دورے پر کابل پہنچے۔ اس موقع پر وزیر خارجہ، وزیر داخلہ، سیکریٹری خارجہ اور قومی سلامتی کے مشیر سمیت گورنر خیبر پختونخوا بھی وزیراعظم کے ہمراہ تھے۔ افغان صدارتی محل میں وزیراعظم شاہد خاقان عباسی کو گارڈ آف آنر بھی پیش کیا گیا۔بعد ازاں وزیراعظم نے افغان صدر سے وفود کی سطح پر ملاقات کی، جس میں سیکیورٹی معاملات، انسداد دہشت گردی، افغان پناہ گزینوں کی واپسی، منشیات کی پیداوار کے خاتمے، افغان امن عمل اور دوطرفہ تعلقات کی مضبوطی سے متعلق تبادلہ خیال کیا گیا۔ پاک افغان قیادت کے درمیان خوشگوار ماحول میں بات چیت ہوئی اور دونوں رہنماں نے علاقائی سلامتی کے مشترکہ اہداف کے حصول پر اتفاق کیا۔