پاک روس دوستی مضبوط شراکت داری میں تبدیل ہورہی ہے،پاکستان

اسلام آباد (آئی این پی )پاکستان کے  دفترخارجہ کے ترجمان ڈاکٹرمحمدفیصل نے کہاہے کہ پاکستان روس کو ایک اہم عالمی طاقت اور شراکت دار سمجھتا ہے جو علاقائی استحکام میں اہم کرداراداکرسکتاہے۔دونوں ملکوں کے درمیان سفارتی تعلقات کے قیام کے سترسال مکمل ہونے کے موقع پر ایک بیان میں انہوں نے کہاکہ پاکستان اور روس کے درمیان دوستی تیزی سے مضبوط شراکت داری میں تبدیل ہورہی ہے جو علاقائی امن اوراستحکام کی ضامن ہے۔انہوں نے کہاکہ دونوں ملکوں کے درمیان تعلقات ،باہمی احترام اوراعتماد اورمشترکہ مفادات پرمبنی ہیں اور ان کے درمیان اہم علاقائی اورعالمی امور پر ہم آہنگی پائی جاتی ہے۔انہوں نے کہاکہ دونوں ملک اپنی مشترکہ ہمسائیگی میں دیرپا امن اوراستحکام کیلئے یکساں سوچ کے حامل ہیں اور علاقائی ترقی اورخوشحالی کے خواہاں ہیں۔