افغان فورسز کی شمالی افغانستان میں کاروائیاں ، اہم کمانڈر ملا یاسین ہلاک

ستائیس اکتوبر کو افغان فوج کے ترجمان عبدالغفار نورستانی نے اپنے بیان میں کہا کہ شمالی افغانستان کے صوبہ قندوز کے مزاحمتی ضلعے خان آباد میں خصوصی فورس کے دستوں کی جانب سے ہفتے کی رات کیے گئے آپریشن میں پانچ عسکریت پسند ہلاک ہوگئے ،طالبان کا اہم کمانڈر ملا یاسین بھی ہلاک ہونے والوں میں شامل ہے۔ ترجمان کے مطابق بدنام زمانہ ملا یاسین کی ہلاکت صوبہ قندوز میں طالبان عسکریت پسندوں کے لیے ایک بڑا دھچکا ہے۔

عبد الغفار نورستانی نے کہا کہ شورش زدہ ضلع میں ملا یاسین کے خاتمے کے بعد سکیورٹی فورسز نے متعدد دیہات کو عسکریت پسندوں کے چنگل سے آزاد کروا لیا ہے
ایک اور اطلاع کے مطابق شمالی افغانستان کے صوبہ جاوزان میں افغان سکیورٹی فورسز کے ساتھ جھڑپ کے دوران گیارہ طالبان ہلاک جب کہ نو زخمی ہو گئے۔ زخمی ہونے والوں میں طالبان کا مقامی رہنما ملا جوورا بھی شامل ہے ۔طالبان عسکریت پسندوں نے ابھی تک ان دونوں کاروائیوں کے حوالے سے کوئی تبصرہ نہیں کیا ہے۔