افغانستان کے صوبے قندوز میں فوجی آپریشن ،سکیورٹی اہلکاروں سمیت اکیس افراد جاں بحق

۲۸ اکتوبر کو افغان فوج کے ترجمان عبدالخلیل خلیلی نے شمالی قندوز میں کیے جانے والے آپریشن کلین اپ کے بارے میں تفصیلات سے آگاہ کرتے ہوئے کہا کہ پیر کے روز شمالی صوبہ قندوز کے کچھ حصوں میں سرکاری فوج کی جانب سے کیے جانے والے آپریشن میں چھ سکیورٹی اہلکاروں اور پندرہ عسکریت پسندوں سمیت کم از کم اکیس افراد جاں بحق ہوئے ۔ جنگی طیاروں کی مدد سے کیا جانے والا یہ آپریشن چاردرہ ، دشت ارچی اور اقتاش کے اضلاع میں کیا گیا جس میں پندرہ مسلح باغی ہلاک جب کہ دس زخمی ہوئے۔ ترجمان نے یہ بھی بتایا کہ لڑائی میں چھ سکیورٹی اہلکار ہلاک جب کہ سات زخمی ہوئے ہیں۔

ایک اور اطلاع کے مطابق افغانستان کےشمالی صوبہ فاریاب کے ضلع پشتون کوٹ میں فوج کے ترجمان محمد حنیف رِضائی نے طالبان کے خلاف چمقق کے علاقے میں اتوار کی رات کیے گئے آپریشن کی تفصیلات بتاتے ہوئے آگاہ کیا کہ اس کارروائی میں اب تک چھ مسلح طالبان ہلاک جب کہ آٹھ زخمی ہوئے ہیں ۔

فوج کے ترجمان کا کہنا ہے کہ ا ن تمام علاقوں میں یہ آپریشن تب تک جاری رہیں گے جب تک کہ یہ اضلاع طالبان سے خالی نہیں ہوجاتے ۔

ابھی تک طالبان کی جانب سے دونوں میں سے کسی بھی کارروائی کے حوالے کوئی بیان سامنے نہیں آیا ہے ۔