بین الاقوامی ماہر گروپ چینی ماہرین کے ساتھ مل کر نوول کرونا وائرس انفیکشن کے نمونیا کی وبا سے لڑیں گی، عالمی ادارہ صحت

عالمی ادارہ صحت کے ڈائریکٹر جنرل ٹیڈروس ادھانوم گبریسس نے مقامی وقت کے مطابق دس تاریخ کو رسمی پریس کانفرنس میں کہا کہ عالمی ادارہ صحت کی جانب سے بین الاقوامی ماہر گروپ کی پہلی کھیپ کے ارکان چین پہنچ گئے ہیں۔ وہ اپنےچینی ہم منصبوں کے ساتھ مل کر نوول کرونا وائرس انفیکشن کے نمونیا کی وبا کے خلاف کام کریں گے۔

ٹیڈروس ادھانوم گبریسس نے کہا کہ ماہر گروپ میں دس سے پندرہ ارکان شامل ہیں۔ وہ چینی ماہرین کے ساتھ مل کرکام کریں گے اور درپیش مسائل سے نمٹنے کے لئے ضروری مہارتوں کے حصول کو یقینی بنائیں گے۔

عالمی ادارہ صحت کے تحت ایمرجنسی پروگرام کے رہنما مائیکل ریان نے کہا کہ ماہر گروپ کا اولین مقصد سیکھنا ہے۔ وہ نہ صرف نوول کرونا وائرس کے حوالے سے زیادہ معلومات حاصل کریں گے ، بلکہ وائرس کی تحقیق کے حوالے سے چینی سائنسدانوں اور طبی ماہرین کے تجربات سے بھی استفادہ کریں گے۔ وہ بنیادی سطح سے اعلیٰ ترین سطح تک صحت عامہ کے رد عمل کے نظام کو سمجھنے کی کوشش بھی کریں گے۔