امن معاہدے کے بعد پہلی بار طالبان ٹھکانوں پر امریکی بمباری

افغانستان میں امریکی فوج نے امن معاہدے پر دستخط ہونے کے بعد پہلی بار چار مارچ کو جنوبی افغانستان کے صوبہ ہلمند میں طالبان کے ٹھکانوں پر حملہ کیا۔

امریکی فوج کے ترجمان نےسوشل میڈیا پر ایک بیان میں کہا کہ فضائی حملوں میں ضلع نہر سراج کے علاقے میں افغان طالبان کو نشانہ بنایا گیا۔ انہوں نے مزید کہا کہ طالبان کے حملے کو پسپا کرنے کے لئے یہ ایک دفاعی اقدام تھا ۔افغان سیکیورٹی فورسز کے ذرائع نے صحافیوں کو تصدیق کی ہے کہ امریکی فضائی حملے میں طالبان کا ایک اہم رکن ہلاک ہوا ہے۔

امن معاہدے پر دستخط ہونے کے بعد ، افغانستان کے مختلف حصوں میں تنازعات اب بھی موجود ہیں۔ مقامی میڈیا رپورٹس کے مطابق ، معاہدے پر دستخط ہونے کے بعد افغان طالبان نے افغان سیکیورٹی فورسز کے ساتھ لڑائی دوبارہ شروع کردی ہے۔

حالیہ واقعے پر طالبان نے کوئی رد عمل ظاہر نہیں کیا ہے۔