وو ہان میں کووڈ-۱۹ کے نئےکیس کا سامنے نہ آنا باعث امید ہے، عالمی ادارہ صحت

مقامی وقت کے مطابق بیس تاریخ کو عالمی ادارہ صحت کے ڈائریکٹر جنرل ٹیڈروس ایڈہانوم گیبریسس نے جنیوا میں کووڈ-۱۹ سے متعلق رسمی کانفرنس میں کہا کہ پوری دنیا میں دو لاکھ سے زائد تصدیق شدہ کیسز کی رپورٹ ملی ہے تاہم وو ہان شہر میں نیا کیس سامنے نہیں آیا ۔یہ دنیا کے دوسرے علاقوں کے لیے امید اور ہمت کا باعث ہے۔اس سے ظاہر ہوتا ہے کہ سنگین ترین صورتحال کو بھی بہتر بنایا جاسکتاہے اورکووڈ-۱۹ پرقابو پایا جا سکتا ہے ۔اس کیلئے معاشرے کے تمام افراد کی بھرپور کوششوں ، اتحاد اور تعاون کے ساتھ ساتھ بہادر طبی عملے اور موثر سپلائی چین کی ضرورت ہے۔

ٹیڈروس نے کہا کہ ذاتی حفاظتی سامان کے حوالے سے عالمی ادارہ صحت مدد فراہم کرے گا ۔اس حوالے سے بعض چینی اداروں نے عالمی ادارہ صحت کو متعلقہ سازوسامان فراہم کرنے کےارادے کااظہار کیا ہے۔

عالمی ادارہ صحت کی یومیہ رپورٹ کے مطابق انیس مارچ تک دنیا میں کووڈ-۱۹ کے تصدیق شدہ کیسز کی کل تعداد 234073 رہی جبکہ ہلاک ہونے والوں کی تعداد 9840 ہوگئی ہے۔