عالمی تجارتی تنظیم کے ڈائریکٹر جنرل کاعہدے کی مدت مکمل ہونے سےقبل ہی ذمہ داریوں سے سبکدوش ہونے کا اعلان

چودہ مئی کو عالمی تجارتی تنظیم کی خصوصی ویڈیو کانفرنس میں عالمی تجارتی تنظیم کے ڈائریکٹر جنرل رابرٹو ایزےویدونے اعلان کیا کہ وہ رواں سال اکتیس اگست یعنی اپنے عہدے کی مدت کے مکمل ہونے سے ایک سال قبل ہی باضابطہ طور پر اپنی ذمہ داریوں سے سبکدوش ہو جائیں گے ۔ رابرٹو ایزےویدونے ستمبر ۲۰۱۳میں عالمی تجارتی تنظیم کے ڈائریکٹر جنرل کا عہدہ سنبھالا تھا ۔ ۲۰۱۷ میں وہ اس عہدے کے لیے دوبارہ منتخب ہوئے اور اکتیس اگست۲۰۲۱ تک انہیں اس عہدے پر کام کرنا تھا۔ قبل از وقت عہدہ چھوڑنے کا سبب بتاتے ہوئے انہوں نے واضح کیا کہ اس فیصلے کا تعلق نہ تو ان کی صحت سے ہے نہ ہی وہ کسی سیاسی موقع سے فائدہ اٹھانے کی تلاش میں ہیں ۔ ان کا کہنا تھا کہ یہ ایک ذاتی فیصلہ اور خاندان کا فیصلہ ہے ۔ ان کو یقین ہے کہ یہ فیصلہ عالمی تجارتی تنظیم کے بہترین مفاد میں ہے ۔ انہوں نے کہا کہ ہو سکتا ہے کہ عالمی تجارتی تنظیم ایک کامل ادارہ نہ ہو مگر یہ ایک ضروری ادارہ ہے ۔ اس سے ہم کم از کم تجارتی شعبے میں" جنگل کے قانون " جیسی صورتِ حال سے بچ سکتے ہیں ۔