کووڈ-19 کے مقابلے کے لئے سائنسدانوں کو عالمی تعاون کا پلیٹ فارم مہیا کیا جائے گا،عالمی ادارہ صحت

عالمی ادارہ صحت کی چیف سائنسدان سومیا سوامی ناتھن نے  دو جولائی کو ایک پریس کانفرنس میں انکشاف کیا کہ حال ہی  میں اختتام پزیر ہونے والے دوسرے ریسرچ اینڈ انوویشن فورم میں کلینیکل ٹرائلز میں داخل ہونے والی 15 نوول کورونا وائرس ویکسین کی تحقیقاتی ٹیم نے ان کے تجرباتی ڈیزائن کو عام کر دیا ہے۔

دوسرا ریسرچ اینڈ انوویشن فورم یکم جولائی سے دو جولائی تک منعقد ہوا ۔ جس میں 93 ممالک اور علاقوں کے تقریباً 1،300 ماہرین نے شرکت کی۔ سوامی ناتھن نے کہا کہ تمام سائنسدانوں نے تعاون کرنےپر بھرپور رضامندی ظاہر کی ہے  اور تحقیق کی تازہ صورت حال ، علاج کے طریقوں ، اور ویکسین کی تیاری پر وسیع تبادلہ خیال کیا ہے۔

عالمی ادارہ صحت کے شعبہ تحقیق کی سربراہ اینا ریسٹریپو نے کہا کہ پوری دنیا میں نوول کورونا وائرس کی ویکسین کی تیاری کے لئے 150 سے زائد  تحقیقات جاری ہیں ، اور زیادہ سے زیادہ ویکسین کلینیکل ٹرائلز میں داخل ہوں گی۔ انہوں نے کہا کہ تاحال ویکسین کو استعمال میں لانے کے حوالے سے کوئی ٹائم ٹیبل دینا ممکن نہیں ہے ، "لیکن یہ زیادہ اہم  ہے کہ ہم نے اس حوالے سے بہت زیادہ اتفاق رائے حاصل کرلیا ہے اور ہم نے بہت سے امور پر  اہم تعاون کیا ہے۔ ہم ان ویکسین کی تیاری کو تیز کررہے ہیں اور ان کی افادیت کو بہتر بنانے کے لئے سخت محنت کر رہے ہیں۔ "