اقوام متحدہ کے سیکریٹری جنرل کی جانب سے بین الاقوامی تعاون پر زور

چھبیس اکتوبر کو اقوام متحدہ کا پچھترواں یومِ تاسیس منانے کے لیے نیو یارک میں ایک تقریب کا اہتمام کیا گیا ۔ اس موقع پر خطاب کرتے ہوئے اقوامِ متحدہ کے سیکریٹری جنرل انتونیو گوتریز نے کہا کہ صرف بین الاقوامی تعاون ہی کووڈ-۱۹ کی وبا ، آب و ہوا کے بحران ، بڑھتی ہوئی عدم مساوات اور منافرت کے پھیلاؤ پر قابو پا سکتا ہے ۔

انتو نیو گوتریز نے کہا کہ جب اقوامِ متحدہ کا قیام عمل میں آیا تھا تو یہ عالمی اتحاد کی علامت بن گیا اور آج یہ عالمی تعاون کا مرکز ہے۔ اس وقت اقوام متحدہ کا مشن پہلے سے کہیں زیادہ اہم ہے۔ مشترکہ کوششوں کے ذریعے تنازعات کی روک تھام ، پائیدار ترقی کو فروغ دینے ، انسانی حقوق کے تحفظ اور اس کرہ ارض کی حفاظت کے عظیم مقاصد کا حصول ممکن ہو سکتا ہے۔