حال ہی میں ایپل کمپنی کے سی ای او ٹم کوک نے گریٹر چائنا کے باہر تمام سٹورز ستائیس مارچ تک بند رکھنے کے ساتھ ساتھ گریٹر چائنا میں تمام ایپل سٹورز کو دوبارہ کھولنے کا اعلان کیا ہے۔ اس اعلان سے واضح ہے کہ اس وقت ایک طرف دنیا میں کووڈ-۱۹ وبا کی صورتِ حال سنگین ہو رہی ہے اور دوسری طرف چین میں وبا پر قابو پانے کے ساتھ ساتھ معیشت تیزی سے بحال ہو رہی ہے۔

وبا پر قابو پانے کے ساتھ ساتھ چین میں سرمایہ کاری بھی بحال ہو رہی ہے۔فائیو جی ، انڈسٹری انٹرنیٹ،انٹرنیٹ آف تھنگز سمیت نئے طرز کی بنیادی تنصیبات کی تعمیر میں سرمایہ کاری بڑھ رہی ہے۔مارچ میں چین کے تقریباً تیس صوبوں اور شہروں میں کئی ارب یوان مالیت کی نئی طرز کی بنیادی تنصیبات کی تعمیر پر سرمایہ کاری کے منصوبوں کا آغاز ہوا ہے۔چین کے قومی محکمہِ شماریات کے اعدادوشمار سے ظاہر ہے کہ جنوری سے فروری تک وبا کے باوجود چینی معیشت میں بہتر ی کے طویل مدتی رجحان میں تبدیلی نہیں آئی۔

وبا پھوٹنے کے بعد چین نے صنعتی و کاروباری اداروں کی مدد و حمایت کے لیے کئی اہم اقدامات اختیار کیے ہیں۔مثلاً مالی اداروں کے ٹیکس میں کمی اور رعایتی قرضوں کی فراہمی سمیت دیگر اقدامات کے ذریعے کھربوں یوان کی مالیاتی اعانت کا انتظام کیا گیا۔مرکزی بنک نے جلد ہی سترہ کھرب یوان کا ورکنگ کیپٹل ریلیز کر دیا جس سے مارکیٹ کی توقعات مزید مستحکم ہوئیں ۔

درست اور مضبوط پالیسی کےباعث چین کی معیشت پر اس وبا کے اثرات بیرونی سطح تک محدود ہیں جو قلیل مدتی اور قابل کنٹرول ہیں۔ اقوام متحدہ کے سیکریٹری جنرل انتونیو گوتریز نے کہا کہ اپنے مضبوط عزم اور صورتِ حال کے مطابق خود کو ڈھالنے کی صلاحیت کے باعث چین نہ صرف جلد ہی اس وبا پر مکمل قابو پالے گا بلکہ معاشی ترقی کو بھی بحال کرے گا ، جو نہ صرف چینی عوام کے لیے مفید بلکہ دنیا کے لیے بھی اہم ہوگا۔