ہزاروں سال پرانے سینابار کے شہر کا ماضی اور حال

پانچ ستمبر کی صبح چین کے صوبے گوئی چو کے وان شان شہر میں ایک سرگرمی کا انعقاد کیا گیا جس میں چین کی اصلاحات اور کھلے پن پر عملدرآمد کے چالیس سالہ عرصے میں مقامی علاقے پر مرتب اثرات کی عکاسی کی گئی ۔ سرگرمی کا موضوع” ہزاروں سال پرانے سینابار کے شہر کا ماضی اور حال” تھا جس میں سینابار کی مقامی کان کی سروے کی تاریخ اور ان قدرتی ذخائر کے خاتمے کے بعد سیروسیاحت کے فروغ کی مکمل روداد سنائی گئی ۔ 

سیاحوں کی دلچسپی کے لیے ان پرانی کانوں کو اصل حالت برقرار رکھتے ہوئے ایک تفریح گاہ بنا دیا گیا ہے خنک تاریک غار نما کان میں داخل ہوں تو ایک نئی دنیا آپ کے سامنے ہوتی ہےجہاں رنگا رنگ روشنیوں سے سجی سب سے طویل زیر زمین سرنگ اور تاؤ ازم سے متعلقہ اشیا قابل دید ہیں ۔ 

یہاں سے آگے بڑھیں تو انسانی ذہانت کا ایک اور کمال شیشے کا وہ ۶۰ میٹر طویل پل ہے جو بغیر کسی ستون یا سہارے کے ہوا میں معلق ہے اور سیاحوں کو جرات آزمانے پر اکساتا ہے ۔ پل پر سے پوری وادی کا نظارہ بھی  قابل دید ہے۔