جی ٹوئنٹی سمٹ سے چین امریکہ تجارتی کشمکش کے حل کا موقع ملے گا ، مدیرِ اعلی پاکستان ٹوڈے

بیس جون کوپاکستان ٹوڈے کے مدیرِ اعلی میاں ابرار نے چائنا میڈیا گروپ کی صحافی کو انٹرویو دیتے ہوئے کہا کہ عنقریب منعقد ہونے والی جی ٹوئنٹی سمٹ ،چین امریکہ تجارتی کشمکش کے حل کا موقع فراہم کرے گی۔انہوں نے کہا کہ امریکی حکومت کی جانب سے شروع کی جانے والی تجارتی کشمکش سے امریکی معیشت کو جو نقصان پہنچا ،وہ چین کو پہنچنے والے نقصان سے کہیں زیادہ ہے۔

پاکستان ٹوڈے کے مدیر اعلی نے کہا کہ اس تجارتی کشمکش میں چین صبروتحمل سے کام لے رہا ہے تاہم امریکی بالادستی کے اس عمل سے تجارتی کشمکش میں کشیدگی مسلسل بڑھ رہی ہے۔اس وقت امریکہ کے اندر بھی تجارتی جنگ کے خلاف آوازیں بلند کی جا رہی ہیں۔

میاں ابرار کا کہنا ہے کہ موجودہ صورتحال میں جاپان میں منعقد ہونے والی جی ٹوئنٹی سمٹ مسائل کے حل کے لیے ایک اچھا موقع فراہم کرے گی اور عالمی برادری کو امید ہے کہ امریکہ مذاکرات کی میز پر واپس آئے گا۔