چین پاکستان میں دہشت گردی اور انتہا پسندی کے خاتمے کے لئے پرعزم ہے، چینی سفارتخانے کے نائب سربراہ!
2018-07-14 15:39:20
پاکستان میں چینی سفارتخانے کے نائب سربراہ چاؤلی چیان نے مستونگ دھماکے کی شدید الفاظ میں مذمت کرتے ہوئے غمزدہ خاندانوں سے اظہار تعزیت کیا ہے۔
تفصیلات کے مطابق پاکستان میں تعینات نائب چینی سفیر نے سوشل میڈیا پر جاری اپنے تعزیتی بیان میں مستونگ دھماکے کی شدید ترین الفاط میں مذمت کی، ٹوئٹر پر جاری کئے گئے پیغام انہوں نے کہا کہ مذکورہ حملہ آرمی پبلک اسکول کے بعد دوسرا ہولناک دھماکہ ہے۔ اس موقع پر انہوں نے دھماکے میں جاں بحق ہونے والے افراد کے اہل خانہ سے اظہار تعزیت کیا اور کہا کہ مشکل کی اس گھڑی میں چین پاکستان کے شانہ بشانہ کھڑا ہے، اور وہ پاکستان میں دہشت گردی اور انتہا پسندی کے خاتمے کے لئے پرعزم ہیں۔