مقامی وقت کے مطابق 30اپریل کو اقوام متحدہ کے سیکرٹری جنرل انتونیو گوتریس نے ایک بیان میں کہا کہ سوڈان میں تیزی سے بگڑتے ہوئے انسانی بحران کے پیش نظر اقوام متحدہ کے انسانی امور کے انڈر سیکرٹری جنرل اور ایمرجنسی ریلیف کوآرڈینیٹر مارٹن گریفتھس علاقے کا دورہ کریں گے۔ بیان میں ایک بار پھر سوڈان میں تنازع کے تمام فریقوں پر زور دیا گیا ہے کہ وہ شہریوں اور سویلین بنیادی ڈھانچے کا تحفظ کریں، شہریوں کے انخلا کے لیے محفوظ راستہ فراہم کریں اور انسانی ہمدردی کے کارکنوں کا احترام کریں۔ بیان میں ان پر زور دیا گیا ہے کہ وہ  امدادی کارروائیوں میں سہولت فراہم کریں، طبی عملے کا احترام کریں اور نقل و حمل اور سہولیات کو لاحق نقصان سے بچیں۔ 
مارٹن گریفتھس نے ایک بیان میں کہا کہ انتہائی متاثرہ شہری مراکز خاص طور پر خرطوم میں روزمرہ کی اشیائے ضروریہ تیزی سے نایاب ہوتی جا رہی ہیں، نقل و حمل کے اخراجات تیزی سے بڑھ چکے ہیں ، جس سے انتہائی کمزور طبقے کی محفوظ علاقوں میں منتقلی میں رکاوٹ آئی ہے  اور متاثرین کی ہنگامی صحت کی سہولیات تک رسائی بھی محدود ہے۔ انہوں نے کہا کہ اقوام متحدہ اور شراکت دار سوڈان میں انسانی ہمدردی کی بنیاد پر سرگرمیاں دوبارہ شروع کرنے کی پوری کوشش کر رہے ہیں۔