15 جولائی کو ، اقوام متحدہ کے انڈر سیکرٹری جنرل برائے انسانی امور اور ہنگامی ریلیف کوآرڈینیٹر مارٹن گریفتھس نے سوڈان کی صورتحال پر ایک بیان جاری کیا ، جس میں سوڈان میں تنازعہ کے دونوں فریقوں پر زور دیا گیا کہ وہ اس سال مئی میں دستخط کردہ جدہ اعلامیے پر عمل کریں اور شہریوں کے تحفظ اور سوڈان میں انسانی سرگرمیوں کی ضمانت دینے کے اپنے وعدوں کو پورا کریں۔
گریفتھس نے کہا کہ چونکہ سوڈان میں مسلح تنازعہ اپنے چوتھے مہینے میں داخل ہو رہا ہے،لاکھوں  مقامی لوگوں کی مدد کرنا انتہائی  مشکل ہو گیا ہے جنہیں انسانی امداد کی اشد ضرورت ہے۔ صرف جنگ بندی ہی سوڈان کے مصائب کا خاتمہ کر سکتی ہے۔ انہوں نے بین الاقوامی برادری پر زور دیا کہ وہ اس بات کو یقینی بنانے کے لیے مل کر کام کرے کہ سوڈان کا تنازع ایک سفاکانہ اور نہ ختم ہونے والی خانہ جنگی میں تبدیل نہ ہو۔
سوڈانی مسلح افواج اور ریپڈ سپورٹ فورس کے درمیان 15 اپریل کو سوڈان کے دارالحکومت خرطوم میں مسلح جھڑپیں شروع ہوئیں اور آج تک جاری ہیں۔ اقوام متحدہ کے دفتر برائے رابطہ انسانی امور نے 14 جولائی کو اطلاع دی تھی کہ سوڈان میں مسلح تنازعے میں ملک بھر میں 1،136 افراد ہلاک اور تقریبا 12،000 زخمی ہوئے ہیں۔رپورٹ میں کہا گیا ہے کہ ہلاکتوں کی یہ تعداد صرف سوڈانی اسپتالوں سے جمع کردہ اعداد و شمار کی عکاسی کرتی ہے، اور ہلاکتوں کی اصل تعداد اس سے کہیں زیادہ ہونے کا امکان ہے۔