نو تاریخ کو چینی وزارت خارجہ کے ترجمان لین جیئن نے یومیہ پریس کانفرنس میں نیٹو کے سیکرٹری جنرل جینز اسٹولٹن برگ کے بیان پر صحافیوں کے سوالات کے جوابات دیے ۔
ترجمان نے کہا کہ نیٹو سرد جنگ کی باقیات اور دنیا کے سب سے بڑے فوجی بلاک کی حیثیت سے ایک علاقائی اور دفاعی تنظیم ہونے کا دعویٰ کرتی ہے جبکہ اپنی طاقت بڑھانے، محاذ آرائی پر اکسانے اور بالادستی اور غنڈہ گردی میں ملوث ہونے کے لیے مسلسل سرحد پار کرتی رہتی ہے۔ نیٹو کی نام نہاد سلامتی دوسروں کی سلامتی کی قیمت پر آتی ہے، اور اس کے اقدامات نے دنیا اور خطے کے لئے انتہائی سنگین سیکورٹی خطرات پیدا کیے ہیں. چین نیٹو کی جانب سے چین پر حملوں اور الزام تراشی کی سختی سے مخالفت کرتا ہے اور نیٹو کے مشرق کی جانب ایشیا بحرالکاہل کے خطے میں داخلے اور علاقائی تناؤ کو ہوا دینے کے لیے چین کو بطور بہانہ استعمال کرنے کی مخالفت کرتا ہے۔
ترجمان نے مزید کہا کہ چین عالمی امن کا معمار، عالمی ترقی میں شراکت دار اور بین الاقوامی نظم و نسق کا محافظ ہے اور یوکرین بحران جیسے بین الاقوامی اور علاقائی ہاٹ اسپاٹ مسائل پر اس کی معروضی اور منصفانہ پوزیشن اور تعمیری کردار کو بین الاقوامی برادری نے طویل عرصے سے تسلیم کیا ہے۔ ہم نیٹو پر زور دیتے ہیں کہ وہ چین کے بارے میں اپنے غلط تصور کو درست کرے، سرد جنگ کی ذہنیت اور زیرو سم گیم کو ترک کرے، "مشترکہ دفاع" کے جھنڈے تلے "چھوٹے حلقوں" میں مشغول ہونا بند کرے اور عالمی امن، استحکام اور ترقی کو فروغ دینے کے لئے کچھ عملی کام کرے۔